ပညာရေး အကျပ်အတည်း (၁၉)

Non-formal Education နဲ့ ပတ်သက်ပြီး အခြေခံပညာ ဦးစီးဌာန ရဲ့ ညွှန်ကြားရေးမှူးချုပ် ဟောင်း ဦးသန်းဦးက ကျောင်းပြင်ပ၌ ဆောင်ရွက်ပေးရမည့် အများပြည်သူတို့အတွင်း သင်ယူဆည်းပူးရေး၊ အလုပ်ခွင်အတွင်း သင်ယူ လေ့ကျင့်ပေးရေး စသည့် ကျောင်းပြင်ပ ပညာရေး ... လို့ ပြောထားပါတယ်။

ထိုင်းနိုင်ငံအခြေစိုက် ပညာရေးပါရဂူ ဒေါက်တာသိန်းလွင်ကတော့ ကျောင်းပြင်ပ ပညာရေး တွေမှာ Informal Education က လွတ်လပ်ပြီး Non-formal Education ကတော့ စနစ်ကျမှု ပို ပါ တယ်လို့ ပြောပါတယ်။



မြန်မာနိုင်ငံမှာ ကျောင်းပြင်ပ ပညာရေးအနေနဲ့ Non-formal Education အစီအစဉ်တွေ တော်တော် များများ ရှိပါတယ်၊ အဲဒီ အစီအစဉ်တွေဟာ ကျောင်းတွင်းပညာရေးနဲ့ ဆက်စပ် နေကြပါတယ်။ ဒါကြောင့်ပဲ ပညာရေး သုတေသီတွေက သက်မွေးပညာရေး၊ အထူးပညာ ရေး၊ အဝေးသင်ပညာရေးတို့ရဲ့ သဘောသဘာဝ မှာ ကျောင်းတွင်း ပညာရေး (Formal Education) နဲ့ ကျောင်းပြင်ပ ပညာရေး( Non-formal Education) လက္ခဏာ နှစ်ရပ်စလုံး ဆောင်နေတယ်လို့ ထောက်ပြ ကြပါတယ်။

များသောအားဖြင့် Non-formal Education ကို အစိုးရနဲ့အတူ၊ ကုလသမဂ္ဂအစီအစဉ်တွေ အစိုးရမဟုတ်တဲ့ အဖွဲ့အစည်း (NGO)တွေ၊ လူမှုအသင်းအဖွဲ့တွေက ထူထောင်ကြပါတယ်၊ ရည်ရွယ်တာကတော့ ကျောင်းပညာ ရေး မရနိုင်တဲ့သူတွေအတွက် အလုပ်မပျက် ပညာ သင်ယူနိုင်ရေးပါပဲ၊ အဲဒီအပြင် ကျောင်းပညာရေးထဲက မရ နိုင်တဲ့ ခေတ်နဲ့ ညီတဲ့ ဗဟုသုတ တွေ၊ ပညာပေးသင်ခန်းစာတွေကို ကျောင်းပြင်ပ ပညာရေး(Non-formal Education) ကနေ ပေးနိုင်ပါတယ်။ ဥပမာ- မူးယစ်ဆေးဝါးရဲ့ အန္တရာယ်တွေ၊ HIV/ AIDS ပညာပေး အပါ အ၀င် ကျန်းမာရေး ပညာပေးတွေ၊ လူကုန်ကူးတဲ့ ပြဿနာတွေ၊ သတင်းနဲ့ နည်းပညာ အသုံးပြုပုံတွေ၊ လူ့အခွင့် အရေးတွေ၊ အသက်မွေးဝမ်းကြောင်းပညာတွေ အများကြီး သင်ပေးနိုင်ပါတယ်။ လောလောဆယ် ဂျာမနီနိုင်ငံရဲ့ အကူအညီနဲ့ ယူနီဆက်ဖ်က လုပ်နေတဲ့ ကျောင်းပြင်ပ ပညာရေးမှာ HIV ပညာပေးကို ပူးတွဲ သင်ပေးနေတာမျိုး ပါပဲ။


စစ်အစိုးရကတော့ သူ့ လက်ထက်မှာ ‘စက်မှု စိုက်ပျိုးနှင့် သက်မွေး ပညာဦးစီးဌါန’ ရဲ့ အစီအစဉ်နဲ့ အတတ်ပညာ နယ်လှည့် သင်ကြားရေး အဖွဲ့တွေ ဖွဲ့စည်းခဲ့တယ်။ ကုလသမဂ္ဂ အဖွဲ့အစည်းတွေနဲ့ ပူးပေါင်းဆောင်ရွက်ပြီး သင်တန်းတွေ အများအပြား ပေးခဲ့တယ်လို့ ဆိုပါတယ်။ ဒါနဲ့ ပတ်သက်လို့ အဆင့်မြင့် ပညာဦးစီးဌာနရဲ့ ညွန်ကြားရေးမှူးချုပ် ဦးမျိုးညွန့်က သူ့ရဲ့ စာတမ်းတစ်စောင်မှာ ကျောင်းပြင်ပ ပညာရေးအနေနဲ့ သင်ကြားပေးတဲ့ သင်တန်း တွေကတော့ အချုပ်အလုပ်သင်တန်း၊ အချက်အပြုတ်သင်တန်း၊ ပရိဘောဂသင်တန်း၊ အိမ်သုံးလျှပ်စစ် ပစ္စည်းပြင် သင်တန်း၊ စက်ပစ္စည်းပြင်သင်တန်း၊ လက်သမားသင်တန်း၊ ပန်းရံသင်တန်းနဲ့ ဆံသသင်တန်းတွေ ဖြစ်တယ်လို့ ထည့်သွင်း ဖတ်ကြားခဲ့ပါတယ်။ ဒါပေမဲ့ တကယ်တမ်းမှာတော့ လက်ချိုးရေလို့ ရတဲ့ အရေအတွက် လောက်ပဲ သင်တန်းတက်ခွင့် ရခဲ့တာပါ။ ပြည်သူတရပ်လုံး ရနိုင်တဲ့ သင်တန်းတွေ ဖြစ်မလာပါဘူး။

ကျောင်းပြင်ပ ပညာရေးထဲက အဝေးသင်ပညာရေးကတော့ အလုပ်လုပ်တဲ့ လူငယ်တွေအတွက် လိုအပ်တဲ့ ဘွဲ့လက်မှတ် တစ်ခုရဖို့တော့ အထောက်အကူ ပြုတယ်လို့ ဆိုရမှာပါ။ ဒါပေမဲ့ မြန်မာနိုင်ငံရဲ့ အဝေးသင် ပညာရေး စနစ်ကတော့ ပညာခေတ်ကို လိုက်မီ ဖို့အတွက်ဆိုရင် ထင်သလောက် မပေါက်လှပါဘူး။ အဲသလိုပဲ ပုဂ္ဂလိကကျောင်းတွေရဲ့ ပညာရေးဟာလည်း လူနည်းစုဖြစ်တဲ့ လူချမ်းသာသားသမီးတွေအတွက်သာ ဖြစ်နေပါ သေးတယ်။ ချို့တဲ့တဲ့ ကလေးတွေမှာတော့ အားကိုးစရာ ဘုန်းကြီးကျောင်း ပညာရေး ရှိပါတယ်။



အရင်ကတော့ ဘုန်းကြီးကျောင်းပညာရေးဟာ ကျောင်းပြင်ပ ပညာရေး (Non-formal Education)ဆန်ပါတယ်။ အခုတော့ ချို့တဲ့ နွမ်းပါးတဲ့ ကလေးတွေ ပညာသင်ယူနိုင်ဖို့အတွက် ဘုန်းကြီးကျောင်း ပညာရေးက ပုံမှန် ကျောင်းပညာရေး (Formal Education) ဖြစ်လာပါပြီ။ အခုဆိုရင် မြန်မာနိုင်ငံမှာ အစိုးရအသိအမှတ်ပြုဘုန်းတော်ကြီးသင်ကျောင်း ထောင်ကျော် ရှိနေပါပြီ။ စာသင်သားတွေနဲ့ ကိုက်ညီတဲ့ သင်ရိုးတွေကို အဆင့်မီ စနစ်ကျတဲ့အပြင် လွတ်လပ်တဲ့ သင်ကြားနည်းကို သုံးပြီး သင်ပေးနေတာမို့လို့ အောင်မြင်တဲ့ ကျောင်းပြင်ပ ပညာရေး တစ်ခုလို့ ဆိုရမှာပါ။

အဲဒီအပြင် ခုချိန်မှာ အင်တာနက်သုံးတဲ့ လူငယ်တချို့ဟာ အမြင်ကျယ်လာပြီး Online Education တွေကို တောင် ပြည်တွင်းကနေ လှမ်းလျှောက်ပြီး သင်ယူနိုင်နေကြပါပြီ။ ပြီးတော့ ပြည်ပ ပညာသင်ဆုတွေ လျှောက်ပြီး တော့လည်း ကျောင်းသွားတက် နိုင်နေပါပြီ။ ဒါတွေဟာ ကျောင်းပြင်ပ ပညာရေး(Non-formal Education)ကို လေ့လာချဉ်းကပ်ခြင်းရဲ့ အကျိုးဆက်တွေပါပဲ။ ပြီးတော့ မြန်မာနိုင်ငံ ပညာရေး ၀န်ကြီးဌာနရဲ့ နှစ်၃၀စီမံကိန်း ထဲ မှာလဲ အီလက်ထရွန်နစ်ပညာရေးစနစ်( e education) ကို ဦးတည်စေသော သင်ကြားရေး နှင့် ဆက်သွယ်ရေး နည်းပညာ အသုံးပြုမှု တိုးတက်စေရေး လုပ်ငန်း… လို့ ပါတာမို့ ဒါဟာ အစိုးရက ဂရုတစိုက် ပံ့ပိုးပေးရမယ့် အစီအစဉ်ပဲ ဖြစ်ပါတယ်။


ပညာရှင်တွေကတော့ ကျောင်းပြင်ပ ပညာရေး(Non-formal Education) ရဲ့ အားသာချက် ကို အစိုးရ ကျောင်း ပညာရေးနဲ့ ယှဉ်ပြီး သုံးသပ် တင်ပြကြပါတယ်။ အဲဒီမှာ ကျောင်းပညာ ရေးက ကာလရှည်ပြီး ခြုံငုံအသိမျိုးကို ပေးပြီး.. ကျောင်းပြင်ပ ပညာရေးကတော့ အချိန်တိုပြီး အသေးစိတ်ကျတဲ့ အသိပညာမျိုးကို ပေးနိုင်တယ်။ ပြီးတော့ ကျောင်းပညာရေးက ပညာရှင်ဆန်ပြီး ကျောင်းပြင်ပ ပညာရေးကတော့ လက်တွေ့ကျကျ ဖြေရှင်းနိုင် စေတယ်လို့ ဆိုပါတယ်။ အဲဒီအပြင် ကျောင်းပညာရေးက သီးခြားဆန်ပြီး ဘောင်ကျဉ်းသလောက် ကျောင်းပြင်ပ ပညာရေးကတော့ ကျယ်ဝန်း လွတ်လပ်ပြီး လူမှုလောကနဲ့ ဆက်နွယ်နေတယ်လို့လည်း ဆိုပါတယ်။ ကျောင်းပြင်ပ ပညာရေးရဲ့ အထင်ရှားဆုံး အားသာချက်ကတော့ လူတစ်ဦးချင်းအနေနဲ့ ကိုယ်ဆန္ဒ ရှိ သလောက် ပညာသင်ယူနိုင်တဲ့အချက်ပါပဲ လို့ ပညာရေးပညာရှင်အများစုက လက်ခံထား ပါတယ်၊

ဒါကြောင့်ပဲ လက်ရှိ မြန်မာပြည်ရဲ့ နိုင်ငံရေး၊ စီးပွားရေး၊ လူမှုရေးနဲ့ ပညာရေး အဆင့်အတန်း အခြေအနေတွေ အရဆိုရင် ကျောင်းပြင်ပ ပညာရေး(Non-formal Education) ကို အားပေးဖို့ဟာ အစိုးရတိုင်းက လုပ်သင့်တဲ့ စနစ်တစ်ခုပဲ ဖြစ်တယ်လို့ ပညာရှင်တွေက အဆိုပြုထားတာ တွေ့ရပါတယ်။ ဒါမှပဲ လူတိုင်း ပညာတတ်ရေးနဲ့ အတူ ပညာခေတ်ကို နိုင်ငံတကာနဲ့ အမီ လိုက်နိုင်မှာ ဖြစ်ပါတယ်။

မြန်မာနိုင်ငံမှာတော့ ခုချိန်မှာ ပညာလိုလားတဲ့လူငယ်တွေအတွက် ကျောင်းပြင်ပ ပညာရေး ကို သင်တန်းပုံစံ အမျိုးမျိုး နဲ့ သင်ယူနိုင်ကြဖို့.. အစိုးရ အဖွဲ့အစည်းတွေ၊ အစိုးရမဟုတ်တဲ့ အဖွဲ့အစည်းတွေ၊ သက်ဆိုင်ရာ ကုလသမဂ္ဂ အဖွဲ့အစည်းတွေ၊ ပုဂ္ဂလိက စေတနာရှင်တွေ အားလုံး ကျယ်ကျယ်ပြန့်ပြန့် ပါဝင်ပြီး ၀ိုင်းဝန်း ပံ့ပိုးမှု ကူညီပေးမှုတွေနဲ့ စနစ်တကျ လုပ်သွားကြဖို့ လိုပါတယ်။----

မေငြိမ်း
(၂၀၀၆)